പത്തനംതിട്ട: ജില്ലാ ശുചിത്വ മിഷനും പത്തനംതിട്ട മൗണ്ട് ബഥനി ഇംഗ്ലീഷ് ഹയർസെക്കന്ററി സ്കൂളും മൗണ്ട് ബഥനി സ്കൂൾ എൻഎസ്എസ് യൂണിറ്റിന്റെ ആഭിമുഖ്യത്തിൽ സംയുക്തമായി സംഘടിപ്പിച്ച ശിശു ദിനാഘോഷ പരിപാടി വൻ വിജയമായി. ശിശുദിനമായ 2024 നവംബർ 14 ന് ശിശുദിന സന്ദേശ യോഗത്തോടെയാണ് പരിപാടികൾക്ക് തുടക്കമായത്. ശേഷം സ്വച്ഛതാ ഹി സേവ 2024 ക്യാമ്പയിന്റെ ഭാഗമായി സ്കൂൾ കുട്ടികൾക്കായി സംഘടിപ്പിച്ച ജില്ലാതല മത്സരത്തിൽ വിദ്യാർത്ഥികൾ വരച്ച ചിത്രങ്ങളുടെ പ്രദർശനവും നടന്നു.
പ്രമാടം ഗ്രാമപഞ്ചായത്ത് പ്രസിഡന്റ് നവനീത് വലംഞ്ചുഴിയായിരുന്നു ശിശുദിനാഘോഷ പരിപാടിയുടെ അദ്ധ്യക്ഷൻ. പത്തനംതിട്ട ജില്ല ശുചിത്വ മിഷൻ കോ ഓർഡിനേറ്റർ നിഫിഎസ് ഹക്ക് യോഗത്തിന്റെ മുഖ്യ പ്രഭാഷകനായി. ചിത്ര പ്രദർശനത്തിന്റെ ചുമതല മൗണ്ട് ബഥനി ഇംഗ്ലീഷ് ഹയർസെക്കന്ററി സ്കൂളിലെ എൻഎസ്എസ് യൂണിറ്റിനായിരുന്നു. കുട്ടികളുടെയും രക്ഷകർത്താക്കളുടെയും പങ്കാളിത്തം കൊണ്ട് ചിത്ര പ്രദർശനം ശ്രദ്ധേയമായി. മാലിന്യ നിർമ്മാർജന രംഗത്ത് പത്തനംതിട്ട ജില്ലാ ശുചിത്വ നടത്തുന്ന പ്രവർത്തനങ്ങളെ യോഗത്തിൽ നവനീത് വലംഞ്ചുഴി അഭിനന്ദിച്ചു. സ്കൂൾ കുട്ടികൾക്ക് ശിശുദിനാശംസകളും അദ്ദേഹം അറിയിച്ചു. ശുചിത്വ – മാലിന്യ സംസ്കരണ പ്രവർത്തനങ്ങളെക്കുറിച്ച് കുഞ്ഞുങ്ങളുമായി നിഫി എസ് ഹക്ക് തുറന്ന സംവാദം നടത്തി. ഈ രംഗത്ത് എൻഎസ്എസ് അംഗങ്ങളും വിദ്യാർത്ഥികളും നിരവധി മാതൃകാ പ്രവർത്തനം നടത്തുന്നതായി അദ്ദേഹം പറഞ്ഞു. അത്തരം പ്രവർത്തനങ്ങൾ ആദരിക്കപ്പെടേണ്ടതും അഭിനന്ദനപരമാണെന്നും ജില്ലാ കോ ഓർഡിനേറ്റർ കൂട്ടിച്ചേർത്തു.
മൗണ്ട് ബഥനി ഇംഗ്ലീഷ് ഹയർസെക്കന്ററി സ്കൂൾ പ്രിൻസിപ്പൽ ഫാ. വർഗീസ് പി മാത്യുയായിരുന്നു യോഗത്തിന്റെ അധ്യക്ഷൻ. ശിശുദിന സമ്മേളനത്തിന് ശേഷമാണ് ചിത്ര പ്രദർശനം തുടങ്ങിയത്. ശുചിത്വ മിഷൻ അസിസ്റ്റന്റ് കോ ഓർഡിനേറ്റർ (ഐഇസി) അനൂപ് എസ്, എൻഎസ്എസ് പ്രോഗ്രാം ഓഫീസർ രാജീവ് പി ജി എന്നിവരായിരുന്നു ചിത്ര പ്രദർശനത്തിന്റെ ഈവന്റ് കൺവീനർമാർ. പിടിഎ പ്രസിഡന്റ് സജി എം വർഗീസ് യോഗത്തിൽ ആശംസ അറിയിച്ച് സംസാരിച്ചു.
