പത്തനംതിട്ട: നഗരത്തിന്റെ ഹൃദയത്തുടിപ്പ് ഏറ്റു വാങ്ങാൻ ഒരുങ്ങുകയാണ് ടൗൺ സ്ക്വയർ. മലയോര മേഖലയുടെ സാംസ്കാരിക സംഗമ വേദിയായി ഇവിടം മാറും എന്ന പ്രതീക്ഷയിലാണ് നഗരസഭ. പത്തനംതിട്ടയെ ചരിത്രത്തിൽ അടയാളപ്പെടുത്തിയ പ്രമുഖ വ്യക്തികളായ കെ കെ നായർ, ജസ്റ്റിസ് ഫാത്തിമ ബീവി എന്നിവർക്ക് ഇവിടെ സ്മാരകമുയരും. ഓപ്പൺ സ്റ്റേജിനൊപ്പം കാണികളായി ആയിരം പേരെ ഉൾക്കൊള്ളാനും ഇവിടെ സൗകര്യമുണ്ടാകും.
പ്രത്യേക ശബ്ദം – വെളിച്ച സംവിധാനം, വശങ്ങളിൽ പാർക്ക്, ചെറുപൂന്തോട്ടം, സ്നാക്സ് ബാർ, ശൗചാലയങ്ങൾ എന്നിവ ഉൾപ്പെടെ നഗര ഹൃദയത്തിലെ ഏറ്റവും മനോഹരമായ ഇടങ്ങളിൽ ഒന്നായി ടൗൺ സ്ക്വയർ മാറും. മാസ്റ്റർ പ്ലാനിന്റെ ഭാഗമായ പദ്ധതിക്ക് വേണ്ടി നഗരസഭ പണം നൽകി സ്ഥലം ഏറ്റെടുത്തിരുന്നു. നഗരസഭ ബസ് സ്റ്റാൻഡിൽ നിന്ന് മാറ്റിയ കെ.കെ.നായർ പ്രതിമയ്ക്ക് പകരം ടൗൺ സ്ക്വയറിൽ സ്ഥാപിക്കുന്ന പുതിയ പ്രതിമയുടെ നിർമ്മാണം പൂർത്തിയായി. ജസ്റ്റിസ് ഫാത്തിമ ബീവിയുടെ സ്മരണാർത്ഥം കവാടം സ്ഥാപിക്കുവാനും ബന്ധപ്പെട്ടുവരുമായി നടത്തിയ ചർച്ചയിൽ തീരുമാനമായിരുന്നു.
ജനങ്ങളുടെ സാംസ്കാരിക ഒത്തു ചേരലുകൾക്ക് വേദി ഒരുക്കുകയാണ് ടൗൺ സ്ക്വയർ പൂർത്തിയാക്കുന്നതിലൂടെ ലക്ഷ്യം വെക്കുന്നത്. സാമൂഹ്യ പുരോഗതിയുടെ ചാലക ശക്തിയായ സാംസ്കാരിക മുന്നേറ്റത്തിന് ഇത് ശക്തിപകരും എന്ന് ഭരണസമിതി പ്രതീക്ഷിക്കുന്നതായി നഗരസഭാ ചെയർമാൻ അഡ്വ. ടി സക്കീർ ഹുസൈൻ പറഞ്ഞു.
