തിരുവല്ല – ഹരിത കേരളം മിഷന്റെ നേതൃത്വത്തിൽ പെരിങ്ങര ഗ്രാമപഞ്ചായത്തിൽ ‘ചങ്ങാതിക്കൊരു തൈ’ പദ്ധതി ആരംഭിച്ചു. പഞ്ചായത്തിന്റെ സഹകരണത്തിലൂടെ വിദ്യാലയങ്ങളിൽ നടപ്പാക്കുന്ന പദ്ധതിയുടെ ഉദ്ഘാടനം പെരിങ്ങര പി എം വി ഹൈസ്കൂളിൽ ഗ്രാമപഞ്ചായത്ത് പ്രസിഡന്റ് ഏബ്രഹാം തോമസ് നിർവഹിച്ചു. വീട്ടിൽനിന്നും വിദ്യാർഥികൾ കൊണ്ടുവന്ന ഔഷധ -ഫല വൃക്ഷത്തൈകൾ സ്കൂളിലെ സഹപാഠിക്ക് കൈമാറിയാണ് പദ്ധതി നടപ്പാക്കുന്നത്. വീടുകളിൽ തൈ നടുന്നതിനും പരിപാലിക്കുന്നതിനുമുള്ള നിർദേശം അധ്യാപകർ നൽകി. നവകേരളം കർമ പദ്ധതിയുടെ ‘ഒരു കോടി ജനകീയ വൃക്ഷവത്കരണം- ഒരു തൈ നടാം’ കാമ്പയിന്റെ ഭാഗമായാണ് പദ്ധതി. പ്രഥമാധ്യാപിക റിറ്റി അധ്യക്ഷയായി. വികസനകാര്യ സ്ഥിരം സമിതി അധ്യക്ഷ റിക്കു മോനി വർഗീസ്, ഗ്രാമപഞ്ചായത്തംഗങ്ങളായ അശ്വതി രാമചന്ദ്രൻ, സനൽകുമാരി, എം സി ഷൈജു എന്നിവർ പങ്കെടുത്തു.
