എന്റെ കേരളം പ്രദർശന വിപണന കലാമേള ; സീവേജ് ട്രീറ്റ്മെന്റ് പ്ലാന്റ് (എസ്ടിപി) ലൈവ് ഡെമോയുമായി പത്തനംതിട്ട ജില്ലാ ശുചിത്വ മിഷൻ

പത്തനംതിട്ട – എന്റെ കേരളം പ്രദർശന വിപണന കലാമേളയിലെ സീവേജ് ട്രീറ്റ്മെന്റ് പ്ലാന്റ് (എസ്ടിപി) ലൈവ് ഡെമോ പ്രവർത്തനം വിജയകരമായി തുട‌രുന്നു. പത്തനംതിട്ട ജില്ലാ ശുചിത്വ മിഷന്റെ നേതൃത്വത്തിൽ പത്തനംതിട്ട നഗരസഭയും പത്തനംതിട്ട, കുന്നന്താനം ആസ്ഥാനമായി പ്രവർത്തിക്കുന്ന എബിഎൽ എഞ്ചിനീയറിഗും ചേർന്നാണ് സീവേജ് ട്രീറ്റ്മെന്റ് പ്ലാന്റ് (എസ്ടിപി) ലൈവ് ഡെമോ സംഘടിപ്പിച്ചിരിക്കുന്നത്.

സീവേജ് ട്രീറ്റ്മെന്റ് പ്ലാന്റുകളുടെ പ്രവർത്തനത്തെ അടുത്തറിയാനും എന്റെ കേരളം പ്രദർശന വിപണന കലാമേളയുടെ ഭാഗമായി ഉണ്ടാകുന്ന മലിനജലത്തെ ശുദ്ധീകരിച്ച് പുനരുപയോഗിക്കാനും പത്തനംതിട്ട ശബരിമല ഇടത്താവളത്തിൽ സ്ഥാപിച്ചിരിക്കുന്ന എസ്ടിപി യൂണിറ്റിലൂടെ സാധിക്കും. ഇതിലൂടെ പൊതു സമൂഹത്തിൽ മലിനജലം ശുദ്ധീകരിച്ച് പുനരുപയോഗിക്കേണ്ടതിന്റെ ആവശ്യകതയെക്കുറിച്ച് പൊതുജനങ്ങൾക്കിടയിൽ ബോധവൽക്കരണം നടത്തുവാനും പ്രദർശന വിപണന കലാമേളയുടെ ഭാഗമായി ഉണ്ടാകുന്ന മലിനജലത്തെ ശുദ്ധീകരിക്കുകയുമാണ് ജില്ലാ ശുചിത്വ മിഷന്റെയും പത്തനംതിട്ട നഗരസഭയുടെയും എബിഎൽ എഞ്ചിനീയറിംഗിന്റെയും ലക്ഷ്യം.

മലിനജലം സംസ്കരിക്കുന്നതിന്റെ മൊത്തത്തിലുള്ള ലക്ഷ്യം, കഴിയുന്നത്ര ജലമലിനീകരണം കുറയ്ക്കുകയെന്നതാണ്. മലിനജലത്തിൽ നിന്ന് മാലിന്യങ്ങൾ പൂർണ്ണായും നീക്കം ചെയ്തുകൊണ്ട് ജലത്തെ വീണ്ടും പുനരുപയോഗിക്കാൻ സാധിക്കുന്ന രീതിയിലേക്ക് മാറ്റിയെടുക്കുകയെന്നതാണ് ഈ പ്രവർത്തനത്തിലൂടെ ലക്ഷ്യമിടുന്നത്. ഈ പ്രവർത്തനം ആണ് എസ്ടിപി സംവിധാനത്തിലൂടെ നടക്കുന്നത്.