തിരുവല്ല – കെ - റെയിൽ വിരുദ്ധ ജനകീയ സമിതിയുടെ ആഹ്വാനപ്രകാരം കുന്നന്താനം നടക്കൽ മഞ്ഞക്കുറ്റി പിഴുതിടത്ത് നട്ട സമരവാഴയുടെ
വിളവെടുപ്പ് മുൻ എം.എൽ.എ ജോസഫ് എം. പുതുശ്ശേരി നിർവ്വഹിച്ചു. തുടർന്ന് നടന്ന ലേലത്തിൽ പൂവൻ വാഴക്കുല 28,000 രൂപക്ക് ലേലത്തിൽപ്പോയി. ഈ ലേലത്തുക, ചെങ്ങന്നൂരിൽ അടുപ്പുകല്ല് ഇളക്കി കെ - റെയിൽ മഞ്ഞക്കുറ്റി സ്ഥാപിച്ച തങ്കമ്മയുടെ ഭവനനിർമാണ ഫണ്ടിലേക്ക് സംഭാവന ചെയ്തു.
ജനങ്ങൾ തള്ളിക്കളഞ്ഞ കെ-റെയിൽ സിൽവർ ലൈൻ പദ്ധതിക്കുവേണ്ടി നിലകൊള്ളുന്ന എം.എൽ.എമാരോടുള്ള പ്രതിഷേധ സൂചകമായാണ് വാഴ നട്ടത്. അടിച്ചമർത്താൻ സർക്കാർ എത്ര ശ്രമിച്ചാലും പദ്ധതി പിൻവലിക്കുന്നതുവരെ ശക്തമായ സമരവുമായി മുന്നോട്ടുതന്നെ പോകുമെന്ന് വാഴയുടെ വിളവെടുപ്പ് സമ്മേളനം ഉദ്ഘാടനം ചെയ്ത മുൻ എം.എൽ.എ ജോസഫ് എം. പുതുശ്ശേരി പറഞ്ഞു. നടക്കൽ ജങ്ഷനിൽ നടന്ന യോഗത്തിൽ സമര സമിതി ജില്ല കൺവീനർ മുരുകേഷ് നടക്കൽ അദ്ധ്യക്ഷത വഹിച്ചു.
