പത്തനംതിട്ട – പ്രശസ്ത കഥകളി നടൻ കലാമണ്ഡലം ബാലസുബ്രഹ്മണ്യൻ ആശാന്റെ നേതൃത്വത്തില് അയിരൂർ കഥകളി ഗ്രാമത്തിലെ നാട്യഭാരതി കഥകളി സെന്ററിൽ കഥകളി ചൊല്ലിയാട്ടം തുടങ്ങി.ക്ലബ്ബിന്റെ ആഭിമുഖ്യത്തിൽ നടത്തുന്ന അഞ്ചാമതു ചൊല്ലിയാട്ടമാണിത്.
കഥകളിയിലെ പ്രഥമ ചടങ്ങായ തോടയത്തോടു കൂടിയാണ് ചൊല്ലിയാട്ടം തുടങ്ങിയത്.കാർത്തിക തിരുനാളിന്റെ ” ഹരി ഹര വിധുനിത….എന്ന നാട്ട രാഗപ്പദത്തോടെയാണ് തോടയം തുടങ്ങിയത്. കളരിയിൽ താളം ഉറപ്പിക്കുന്നത് തോടയത്തോട് കൂടിയാണ്.
കോട്ടയത്തു തമ്പുരാന്റെ നാലു ആട്ടക്കഥകളിലെ ആദ്യസ്ഥാന വേഷങ്ങളാണ് കളരിയില് ചൊല്ലിയാടിക്കുന്നത്.താപസകുലതിലക…( ബകവധം), ബാലേ കേൾ നീ…( കിർമ്മീരവധം),പാഞ്ചാലരാജതനയേ…( കല്യാണസൌഗന്ധികം), സലജ്ജോഹം ( കാലകേയവധം) എന്നീ പദങ്ങളാണ് മുഖ്യമായും ചൊല്ലിയാടുന്നത്. കൂടാതെ സ്ത്രീ കഥാപാത്രങ്ങളായ ലളിത, ഉർവ്വശി എന്നിവരുടെ പദങ്ങളും സുഭദ്രാഹരണം, ഉത്തരാസ്വയംവരം ,നരകാസുരവധം തുടങ്ങിയ കഥകളിലെ പതിഞ്ഞ പദങ്ങളും ചൊല്ലിയാടും.
കല്യാണസൌഗന്ധികത്തിലെ ഭീമന്റെ ശൃംഗാരപ്പദമായ പാഞ്ചാല രാജതനയേ…. ഇന്ന് ചൊല്ലിയാടി. തുടർന്ന് ഹനുമാന്റെ ‘ ആരിഹ വരുന്നത്….എന്ന തപസ്സാട്ടപ്പദവും ചൊല്ലിയാടിച്ചു.
കലാമണ്ഡലം കൃഷ്ണകുമാർ, നാട്യഭാരതി ആദിത്യൻ ( സംഗീതം ) കലാഭാരതി രമണൻ ( മദ്ദളം) ആർ.എൽ.വി.മഹാദേവൻ ( ചെണ്ട),കലാമണ്ഡലം വിഷ്ണുമോൻ, കലാമണ്ഡലം അനന്തു, കലാമണ്ഡലം ഹരികൃഷ്ണൻ ( വേഷം) എന്നിവർ പങ്കെടുത്തു.
ചൊല്ലിയാട്ടക്കളരിയുടെ രണ്ടാം ദിവസമായ നാളെ സ്ത്രീകഥാപാത്രങ്ങളായ ഉർവ്വശി, ലളിത എന്നീ വേഷങ്ങള് ചൊല്ലിയാടും.
വിദ്യാർത്ഥികൾക്കും പൊതുജനങ്ങൾക്കും ചൊല്ലിയാട്ടം കാണുന്നതിനുള്ള സൌകര്യം ഒരുക്കിയിട്ടുണ്ടെന്ന് ജില്ലാ കഥകളി ക്ലബ്ബ് സെക്രട്ടറി വി.ആർ.വിമൽ രാജ് അറിയിച്ചു.
