പത്തനംതിട്ട : വയനാട് ദുരന്ത രക്ഷാദൗത്യത്തിന്റെ ഭാഗമായി അഗ്നിരക്ഷാസേനയുടെ ജില്ലയിൽ നിന്നും 27 അംഗ സംഘം പുറപ്പെട്ടു. ഒരു ഡോക്ടറും സംഘത്തിലുണ്ട്. അഗ്നിരക്ഷാ സേനയുടെ ജില്ലയിൽനിന്നുള്ള മൂന്നാം ഘട്ട സംഘം പത്തനംതിട്ട അഗ്നിരക്ഷാ നിലയത്തിൽനിന്നും ബുധനാഴ്ച രാവിലെ പുറപ്പെട്ടു . യാത്രക്കായി അനുവദിച്ച സ്പെഷ്യൽ കെ. എസ്. ആർ. ടി .സി ബസിലാണ് തിരിച്ചത്. അടൂർ സ്റ്റേഷൻ ഓഫീസർ വിനോദ് കുമാറിൻ്റെ നേതൃത്വത്തിൽ ഉള്ള 27 അംഗ സംഘം ആണ് വയനാട്ടിലേക്ക് പോയത്. ഇവരിൽ 7 വനിതകൾ ഉൾപ്പെടെ 15 പേർ സിവിൽ ഡിഫൻസ് അംഗങ്ങൾ ആണ്. ഈ സംഘം വ്യാഴാഴ്ച മുതൽ ദൗത്യത്തിൻറെ ഭാഗമാകും. തിരുവല്ല സ്വദേശി ഡോ.റോജി പി ഉമ്മനും സംഘത്തിലുണ്ട്. ചായലോട് മൗണ്ട്സിയോൻ മെഡിക്കൽ കോളജിൽ ജോലി ചെയ്യുന്ന ഇദ്ദേഹം കോവിഡ് സമയത്ത് 3 മാസക്കാലം ലക്ഷദീപിൽ വോളന്ററി സേവനം ചെയ്ത ആളാണ്. കൂടാതെ മറ്റു നിരവധി സേവന പ്രവർത്തനങ്ങളിൽ ഏർപ്പെട്ടിരിക്കുന്ന വ്യക്തി കൂടിയാണ് ഇദ്ദേഹം.
