കൊല്ലം – ജീവിതം തരിപ്പണമായി വീണുപോയപ്പോൾ, ഇനി ഈ ഭൂമിയിൽ ജീവിക്കേണ്ടതില്ല എന്ന ഉറച്ച തീരുമാനത്തിലായിരുന്നു അജിത്ത്. ഭാര്യയും മക്കളുമെല്ലാം നഷ്ടപ്പെട്ട്, സഹിക്കാവുന്നതിലും വലിയ ഏകാന്തതയുടെയും സങ്കടത്തിന്റെയും തടവറയിലായ ആ മനുഷ്യൻ തൻ്റെ ജീവിതം അവസാനിപ്പിക്കാനായി റെയിൽവേ ട്രാക്കിലേക്ക് നടന്നു. പക്ഷേ, വിധി അജിത്തിന് മുന്നിൽ വിലങ്ങുതടിയായി.
ദൈവത്തിൻ്റെ കരം പോലെയാണ് ഇരവിപുരം പോലീസ് സ്റ്റേഷനിലെ എസ്.ഐ. നജീബ് ആ നിമിഷം അവിടെയെത്തിയത്. ട്രാക്കിലേക്ക് തിടുക്കത്തിൽ നടക്കുന്ന അജിത്തിന്റെ മുഖത്തെ നിരാശയും ഭാവമാറ്റങ്ങളും തിരിച്ചറിഞ്ഞ എസ്.ഐ. നജീബ്, ഒട്ടും സമയം കളയാതെ സമയോചിതമായി ഇടപെട്ടു. ആ മരണപ്പാച്ചിലിൽ നിന്ന് അജിത്തിനെ പിന്തിരിപ്പിച്ച് ചേർത്തുപിടിച്ച് പോലീസ് സ്റ്റേഷനിലേക്ക് കൊണ്ടുവന്നു.
എന്നാൽ, ആ സ്റ്റേഷനിലേക്കുള്ള ആ വരവ് വെറുമൊരു പോലീസ് നടപടിയായിരുന്നില്ല; ഒരു മനുഷ്യനെ ജീവിതത്തിലേക്ക് തിരികെ കൊണ്ടുവരാനുള്ള നന്മയുടെ കൂട്ടായ്മക്ക് തുടക്കമായിരുന്നു. സ്റ്റേഷനിലെത്തി ഈ വിവരമറിഞ്ഞ ഉടൻ തന്നെ പ്രമുഖ ജീവകാരുണ്യ പ്രവർത്തകരായ ശക്തികുളങ്ങര ഗണേഷും, ബാബുവും, ശ്രീഷ്ചന്ദും ഓടിയെത്തി. മണിക്കൂറുകളോളം അവർ അജിത്തിനോട് സംസാരിച്ചു. അദ്ദേഹത്തിന്റെ ഉള്ളിലെ നെഞ്ചിടിപ്പുകളും നെഞ്ചുപൊട്ടുന്ന വേദനകളും കേട്ടു, ആശ്വസിപ്പിച്ചു. ആത്മഹത്യ എന്ന കടുത്ത തീരുമാനത്തിൽ നിന്ന് ആ മനസ്സിലെ കറുത്ത ചിന്തകളെ അവർ പതിയെ തുടച്ചുനീക്കി.
“ഇനി നിങ്ങൾ ഒറ്റയ്ക്കല്ല, കൂടെ ഞങ്ങളുണ്ട്” എന്ന വാക്കുനൽകി, അജിത്തിനെ കൊല്ലം മൈനാഗപ്പള്ളിയിൽ പ്രവർത്തിക്കുന്ന ഫാദർ മനോജ് കോശി വൈദ്യന്റെ കാർമേൽ സ്നേഹനിലയത്തിലേക്ക് അവർ സുരക്ഷിതമായി എത്തിച്ചു. തണൽ നഷ്ടപ്പെട്ട ആ മനുഷ്യന് ഇനി സ്നേഹനിലയം പുതിയ വീടും പ്രകാശവുമാകും.
ജീവിതത്തിന്റെ ക്ലൈമാക്സ് കുറിക്കാൻ തുനിഞ്ഞിറങ്ങിയ ഒരു മനുഷ്യനെ, സ്നേഹവും കരുതലോടെയുള്ള നോട്ടവും കൊണ്ട് ജീവിതത്തിന്റെ പുതിയൊരു ആമുഖത്തിലേക്ക് തിരിച്ചുനടത്തിയ എസ്.ഐ. നജീബിനും ജീവകാരുണ്യ പ്രവർത്തകരായ ഗണേഷ്, ബാബു, ശ്രീഷ്ചന്ദ് എന്നിവർക്കും ബിഗ് സല്യൂട്ട്.. !! നാളെയെക്കുറിച്ചുള്ള പ്രതീക്ഷകൾ അറ്റുപോകുന്നവർക്ക് മുന്നിൽ ഇവർ കാണിച്ച ഈ നന്മ, മനുഷ്യത്വത്തിന്റെ വിലമതിക്കാനാവാത്ത അടയാളമാണ്.
What do you feel about this post?
Like
Love
Happy
Haha
Sad
