നക്ഷത്ര വിളക്കുകൾ മിന്നിത്തുടങ്ങി ; നിരണം ഗ്രാമം ക്രിസ്മസ് ഒരുക്കത്തിൽ.

നിരണം – ക്രിസ്മസിനെ വരവേൽക്കാൻ നാടും നഗരവും ഒരുങ്ങുന്നു. ഡിസംബർ പിറന്നതോടെ നക്ഷത്ര വിളക്കുകളും ക്രിസ്മസ് ട്രീ സ്ഥാപിക്കുന്നതിന്റെയും തിരക്കിലാണ് ജനങ്ങൾ. തെരെഞ്ഞെടുപ്പ് ചൂടിന്റെ ഇടയിലും പതിവ് രീതികൾക്ക് ഒന്നും തന്നെ മുടക്കം ഇല്ല. ഇതിനായി ഉള്ള ഒരുക്കങ്ങൾ ഇന്നലെ ദൈവാലയങ്ങളിൽ നടന്നു. സെന്റ് തോമസ് ബിലീവേഴ്സ് ഈസ്റ്റേൺ ചർച്ച് നിരണം ഇടവകയിൽ വിശുദ്ധ കുർബാനയ്ക്ക് ശേഷം യൂത്ത് ഫെലോഷിപ്പ്, സണ്ടേസ്കൂൾ വിദ്യാർത്ഥികളുടെ നേതൃത്വത്തിൽ ദൈവാലയങ്ങൾ അലംങ്കരിച്ചു.

ഇടവക വികാരി ഫാദർ മർക്കോസ് പള്ളിക്കുന്നേൽ അധ്യക്ഷത വഹിച്ച ഇടവക എക്സിക്യൂട്ടീവ് യോഗത്തിൽ ക്രിസ്തുമസ് പുതുവത്സര പരിപാടികളുടെ സംബന്ധിച്ച ക്രമീകരണങ്ങൾ വിലയിരുത്തി. ഇടവക സെക്രട്ടറി ഡോ.ജോൺസൺ വി.ഇടിക്കുള, ട്രഷറാർ റെന്നി തോമസ് തേവേരിൽ, ട്രസ്റ്റി അജോയി കെ വർഗ്ഗീസ് എന്നിവർ പങ്കെടുത്തു. ഡിസംബർ ആറിന് വൈകിട്ട് 3 മുതൽ ഇടവകയിൽ വെച്ച് ബൈബിൾ സൊസൈറ്റി ഓഫ് ഇന്ത്യ നിരണം ശാഖയുടെ ആഭിമുഖ്യത്തിൽ ക്രിസ്തുമസ് കരോൾ സർവീസ് നടക്കും. ഇതിന് മുന്നോടിയായി ഉള്ള പരിശീലനം ആരംഭിച്ചു.

ഡിസംബർ 24ന് വൈകിട്ട് 6 മുതൽ ഇടവകയുടെ ആഭിമുഖ്യത്തിൽ കരോൾ സർവീസ് നടക്കും. അതിന് മുന്നോടിയായി ഭവന പ്രാർത്ഥനകൾ നോമ്പ് കാലയളവിൽ ക്രമികരിക്കും. ഡിസംബർ 31ന് വൈകിട്ട് 7ന് വിശുദ്ധ കുർബാനയും ആണ്ടവസാന സ്തോത്ര ശുശ്രൂഷയും ജനുവരി 4ന് പുതുവത്സര ശുശ്രൂഷയും നടക്കും.