ഷാർജ മലയാളി സമാജത്തിന്റെ 'സ്നേഹസദനം' ; ഭവനപദ്ധതിയിലെ ഭവനത്തിന്റെ താക്കോൽദാനം ഓഗസ്റ്റ് 30-ന്

ഷാർജ: പ്രവാസി കൂട്ടായ്മയായ ഷാർജ മലയാളി സമാജത്തിന്റെ (SMS) ജീവകാരുണ്യ പ്രവർത്തനങ്ങളുടെ ഭാഗമായി നിർമ്മിച്ചു നൽകുന്ന ‘സ്നേഹസദനം’ ഭവനപദ്ധതിയിലെ ഭവനത്തിന്റെ താക്കോൽദാനം ഓഗസ്റ്റ് 30 ഞായറാഴ്ച നടക്കും. കോന്നി അരുവാപ്പുലം പുളിഞ്ചാനിയിലെ വാഴവിള മേത്തേതിൽ ഉത്തമൻ കെ.-യ്ക്കാണ് സമാജം ആദ്യ ഭവനം നിർമ്മിച്ച് നൽകുന്നത്. രാവിലെ 10 മണിക്കാണ് താക്കോൽദാന ചടങ്ങ് ക്രമീകരിച്ചിരിക്കുന്നത്.

കേരളത്തിലുടനീളം ലഭിച്ച നിരവധി അപേക്ഷകളിൽ നിന്ന് വിശദമായ പരിശോധനകൾക്കൊടുവിലാണ് ഏറ്റവും അർഹനായ ഗുണഭോക്താവായി ഉത്തമനെ സമാജം കണ്ടെത്തിയത്.

2006-ൽ ഷാർജയിൽ രൂപീകൃതമായ ഷാർജ മലയാളി സമാജം, ജാതി-മത-രാഷ്ട്രീയ ഭേദമന്യേ തികച്ചും സേവനമനസ്സോടെ പ്രവർത്തിക്കുന്ന ഒരു പ്രവാസി സാംസ്കാരിക സംഘടനയാണ്. ഇന്ന് നാനൂറ്റമ്പതിലധികം കുടുംബങ്ങൾ ഈ പ്രസ്ഥാനത്തിൽ അംഗങ്ങളാണ്. സമാജം നടപ്പിലാക്കിവരുന്ന ‘കാരുണ്യ’ പദ്ധതിയുടെ തുടർച്ചയായാണ് ‘സ്നേഹസദനം’ ഭവനപദ്ധതി വിഭാവനം ചെയ്തിരിക്കുന്നത്. നിർധനരായ രോഗികൾക്കുള്ള ചികിത്സാ സഹായം, കൃത്രിമ കാൽ വിതരണം എന്നിവയ്ക്ക് പുറമെ പ്രളയ-കോവിഡ് മഹാമാരി കാലത്തും സമാജം സജീവമായ ദുരിതാശ്വാസ പ്രവർത്തനങ്ങൾ കേരളത്തിൽ നടത്തിയിരുന്നു.

പ്രവാസ ലോകത്തെ നന്മയുടെയും സഹകരണത്തിന്റെയും പ്രതീകമായി പൂർത്തിയാക്കിയ ഈ സ്നേഹഭവനത്തിന്റെ സമർപ്പണ ചടങ്ങിലേക്ക് ഏവരെയും സ്നേഹപൂർവ്വം സ്വാഗതം ചെയ്യുന്നതായി ഷാർജ മലയാളി സമാജം പ്രസിഡന്റ് ശ്രീ പുഷ്പരാജ് ആതവനാട്, ജനറൽ സെക്രട്ടറി ശ്രീ ഷെറിൻ ചെറിയാൻ, ട്രഷറർ ശ്രീ വിനോദ് ബാഹുലേയൻ, കാരുണ്യ കൺവീനർ ശ്രീ ജിജോ പുളിക്കൻ എന്നിവർ അറിയിച്ചു.