റാന്നി: അന്തരിച്ച മുൻ മുഖ്യമന്ത്രി ഉമ്മൻചാണ്ടിക്ക് ആദരാഞ്ജലി അർപ്പിച്ചു മടങ്ങിയ ഐഎൻടിയുസി നേതാവ് വാഹനാപകടത്തിൽ മരിച്ചു. കുമളി അട്ടപ്പള്ളം കാവുങ്കൽ സി.വി വർഗീസ് (56) ആണ് മരിച്ചത്. പുനലൂർ-മൂവാറ്റുപുഴ സംസ്ഥാന പാതയിൽ മക്കപ്പുഴയ്ക്കു സമീപം ബുധൻ പുലർച്ചെ മൂന്നരയോടെയാണ് അപകടം. കാർ നിയന്ത്രണം വിട്ട് ഡിവൈഡറിൽ ഇടിക്കുകയായിരുന്നു. ഈ സമയം വർഗീസിന് ഹൃദയാഘാതം ഉണ്ടായി.
തുടർന്ന് കോഴഞ്ചേരിയിലെ ആശുപത്രിയിൽ പ്രവേശിപ്പിച്ച വർഗീസ് വൈകിട്ട് അഞ്ചോടെ മരിച്ചു. ഒപ്പമുണ്ടായിരുന്ന പ്രസാദ് മാണി, ബിേനായ് നടുപ്പറമ്പിൽ എന്നിവർ പരുക്കില്ലാതെ രക്ഷപ്പെട്ടു. തിരുവനന്തപുരത്ത് നിന്ന് മടങ്ങും വഴിയാണ് അപകടം ഉണ്ടായത്.
