കോഴഞ്ചേരി – ആരോഗ്യമുള്ള സമൂഹവും, പ്രകൃതിയും ഭൂമിയുടെ നിലനിൽപ്പിന് ആവശ്യമാണെന്ന് ആരോഗ്യമന്ത്രി വീണാ ജോർജ് പറഞ്ഞു. 130-മത് മാരാമൺ കൺവൻഷന് മുന്നോടിയായി പ്രകൃതിക്ക് കാവലാവുക എന്ന സന്ദേശം വുമായി കല്ലിശേരി കടവിൽ മാളികയിൽ നിന്നാരംഭിച്ച പരിസ്ഥിതി സൗഹൃദ സന്ദേശയാത്രയുടെ സമാപന സമ്മേളനം മാരാമൺ റിട്രീറ്റ് സെന്ററിൽ ഉദ്ഘാടനം ചെയ്യുകയായിരുന്നു മന്ത്രി.
മനുഷ്യ മനസും പ്രകൃതിയുമെല്ലാം മലിനമാകുന്നു. പ്രകൃതിയുടെ വീണ്ടെടുപ്പിലൂടെ മാത്രമേ ഭൂമിയുടെ നിലനിൽപ്പ് ഉണ്ടാവൂ. സൃഷ്ടിയുടെ സമഗ്രതയാണ് ബൈബിൾ സന്ദേശം. ആഗോള താപനം ഗുരുതരമായ പ്രതിസന്ധി സൃഷ്ടിക്കുന്ന കാലത്തു പ്രകൃതിയുടെ സംരക്ഷണത്തിനായി യോജിച്ച പ്രവർത്തനം ആവശ്യമാണെന്നും മന്ത്രി പറഞ്ഞു. സുവിശേഷ പ്രസംഗ സംഘം പ്രസിഡന്റ് ഡോ. ഐസക് മാർ ഫിലക്സിനോസ് എപ്പിസ്കോപ്പാ അധ്യക്ഷത വഹിച്ചു. ദൈവം സൃഷ്ടിച്ച ലോകത്തെ നല്ല വാസസ്ഥലമായി നിലനിർത്തണമെന്ന് അദ്ദേഹം പറഞ്ഞു.
സുവിശേഷ പ്രസംഗ സംഘം ജനറൽ സെക്രട്ടറി റവ. എബി. കെ. ജോഷ്വാ, മറ്റു ഭാരവാഹികളായ ഡോ. എബി തോമസ് വാരിക്കാട്, ലേഖക സെക്രട്ടറി പ്രൊഫ. എബ്രഹാം. പി. മാത്യു, സഞ്ചാര സെക്രട്ടറി റവ. ജിജി വർഗീസ്, പരിസ്ഥിതി കമ്മിറ്റി കൺവീനർമാരായ ലാലമ്മ മാത്യു, ഗീത മാത്യു, കോഴഞ്ചേരി, മാരാമൺ ഇടവക വികാരിമാരായ റവ.എബ്രഹാം തോമസ്, റവ. ജിജി തോമസ് എന്നിവർ പ്രസംഗിച്ചു. സമ്മേളനത്തിൽ പങ്കെടുത്ത എല്ലാവരും പ്രകൃതി സംരക്ഷണ പ്രതിജ്ഞയെടുത്തു. പ്രോഗ്രാം കോ-ഓർഡിനേറ്റർ സാം ചെമ്പകത്തിൽ പ്രതിജ്ഞ ചൊല്ലിക്കൊടുത്തു. ചിത്രരചനാ മത്സര വിജയികൾക്കു ഡോ. ഐസക് മാർ ഫിലക്സിനോസ് എപ്പിസ്കോപ്പയും മന്ത്രി വീണാ ജോർജും ചേർന്ന് സമ്മാനങ്ങൾ നൽകി.
മാർത്തോമാ സുവിശേഷപ്രസംഗ സംഘത്തിന്റെ ജന്മഗൃഹമായ കല്ലിശേരി കടവിൽ മാളികയിൽ ചേർന്ന സമ്മേളനത്തിൽ ഡോ. യുയാക്കിം മാർ കൂറിലോസ് സഫ്രഗൻ മെത്രാപ്പോലിത്ത യാത്ര ഉദ്ഘാടനം ചെയ്തു. സംഘം ജനറൽ സെക്രട്ടറി റവ. എബി. കെ. ജോഷ്വാ അധ്യക്ഷനായിയിരുന്നു. മാർത്തോമ്മ സഭാ വൈദിക ട്രസ്റ്റി റവ.ഡേവിഡ് ഡാനിയൽ, ഭദ്രാസന സെക്രട്ടറി റവ. സാംസൺ. എം ജേക്കബ്, റവ. ജാക്സൺ ജോസഫ്, പ്രൊഫ. അജിത് വർഗീസ്, യുവജനസഖ്യം ജനറൽ സെക്രട്ടറി റവ.ബിനോയ് ഡാനിയൽ, കൃഷി വിജ്ഞാൻ കേന്ദ്ര ഡയറക്ടർ ഡോ. സി. പി. റോബർട്ട്, കോഴഞ്ചേരി സെന്റ് തോമസ് കോളേജ് എൻ. എസ്. എസ്. കോർഡിനേറ്റർ ഡോ. അഞ്ജു. വി.ജലജ് എന്നിവർ പ്രസംഗിച്ചു. കല്ലിശേരി, ഓതറ, നെല്ലിമല, കുമ്പനാട്, കൂർത്തമല, പൂവത്തൂർ, മാരാമൺ, കോഴഞ്ചേരി എന്നിവടങ്ങളിൽ പൊതു പരിപാടികൾ അവതരിപ്പിച്ചു. കോഴഞ്ചേരി സെന്റ് തോമസ് കോളേജ് എൻ. എസ്. യൂണിറ്റിന്റെ കാര്യവിചാരകത്വത്തിന്റെ ശേഷിപ്പ് തെരുവ് നാടകം, മാർത്തോമാ ഇക്കോളജി കമ്മിഷന്റെ പരിസ്ഥിതി ഗാനങ്ങൾ, കൃഷി വിജ്ഞാന കേന്ദ്രയുടെ 130ഫലവൃക്ഷതൈകളുടെ വിതരണം, മാർത്തോമ്മാ യുവജന സഖ്യം നേതൃത്വത്തിൽ യുവജനങ്ങൾ പങ്കെടുത്ത സൈക്കിൾ യാത്ര എന്നിവ വ്യത്യസ്തമായി.
സുവിശേഷ പ്രസംഗസംഘം മാനേജിങ് കമ്മിറ്റി അംഗങ്ങളായ പി. പി. അച്ചൻ കുഞ്ഞ്, എം. സി. ജോർജ് കുട്ടി, മാത്യു ജോൺ, തോമസ് ജോർജ്, തോമസ് കോശി, സാം ജേക്കബ്, ജോസ്. പി. വയയ്ക്കൽ, റ്റിജു. എം. ജോർജ്, സുബി പള്ളിക്കൽ, ജോർജ്. കെ. നൈനാൻ, യുവജനസഖ്യം ഭാര വാഹികളായ റവ. മിഥുൻ.കെ. ചാക്കോ, ലിബിൻ മാത്യു, കൃഷി വിജ്ഞാൻ കേന്ദ്ര സൂപ്രണ്ട് ബിനു ജോൺ, കോഴഞ്ചേരി പഞ്ചയത്തു പ്രസിഡന്റ് റോയി തോമസ്, കാർഡ് ട്രഷറർ വിക്ടർ. ടി തോമസ് തുടങ്ങിയവർ നേതൃത്വം നൽകി.
