റാന്നി:- നിയമസഭാ തിരഞ്ഞെടുപ്പിനെ നേരിടാൻ റാന്നി നിയോജകമണ്ഡലത്തിൽ എൻഡിഎ (NDA) സ്ഥാനാർത്ഥിയായി *ട്വന്റി20 (20/20)* യുടെ പ്രതിനിധിയായ തോമസ് കെ. സാമുവൽ എന്ന ബ്ലസ്സൻ മത്സരരംഗത്ത്. ബിജെപിയുടെ എ ക്ലാസ് മണ്ഡലമായി കാലങ്ങളായി കരുതപ്പെട്ടിരുന്ന റാന്നിയിൽ കഴിഞ്ഞ കുറച്ച് തിരഞ്ഞെടുപ്പുകളായി എൻഡിഎ ഘടകകക്ഷികൾക്ക് സീറ്റ് നൽകുന്ന തന്ത്രമാണ് ബിജെപി നേതൃത്വം സ്വീകരിക്കുന്നത്.
ഇതിന്റെ ഭാഗമായി കഴിഞ്ഞ 2021-ലെ തിരഞ്ഞെടുപ്പിൽ എൻഡിഎ ഈ സീറ്റ് ഘടകകക്ഷിയായ ബിഡിജെഎസ് (BDJS) നാണ് നൽകിയിരുന്നത്. എന്നാൽ, ഇത്തവണ ബിഡിജെഎസിന് പകരം എൻഡിഎ സഖ്യത്തിലെ പുതിയ ഘടകകക്ഷിയായ ട്വന്റി20 പാർട്ടിക്കാണ് റാന്നി സീറ്റ് അനുവദിച്ചിരിക്കുന്നത്. തുടർന്നാണ് തോമസ് കെ. സാമുവലിനെ ട്വന്റി20 സ്ഥാനാർത്ഥിയായി പ്രഖ്യാപിച്ചത്.
രാഷ്ട്രീയപരമായി ശക്തമായ മത്സരം നടക്കുന്ന റാന്നിയിൽ എൻഡിഎയുടെ ഈ ഘടകകക്ഷി മാറ്റവും ട്വന്റി20യുടെ സാന്നിധ്യവും തിരഞ്ഞെടുപ്പ് പോരാട്ടത്തെ എങ്ങനെ ബാധിക്കുമെന്നത് രാഷ്ട്രീയ നിരീക്ഷകർ ഉറ്റുനോക്കുന്ന കാര്യമാണ്. മുൻ തിരഞ്ഞെടുപ്പുകളിൽ ബിഡിജെഎസിന് ലഭിച്ച വോട്ട് വിഹിതം ട്വന്റി20 സ്ഥാനാർത്ഥിക്ക് നിലനിർത്താനാകുമോ, അല്ലെങ്കിൽ ട്വന്റി20യുടെ പുതിയ വോട്ടുകൾ എൻഡിഎക്ക് അനുകൂലമായി ലഭിക്കുമോ എന്നത് വോട്ടിംഗിൽ നിർണ്ണായകമാകും. എന്തായാലും റാന്നിയിലെ തിരഞ്ഞെടുപ്പ് ചിത്രം കൂടുതൽ ചൂടുപിടിച്ചിട്ടുണ്ട്. വിജയ പ്രതീക്ഷ തന്നെയാണ് എൻഡിഎ ക്യാമ്പിൽ.
