ആലപ്പുഴ – കേരളത്തിലെ മുതിർന്ന സിപിഐ എം നേതാവ്, ജി സുധാകരന് എതിരായ സൈബർ സഖാക്കളുടെ ആക്രമണത്തിൽ കേസെടുത്ത് പുന്നപ്ര പൊലീസ്. മുഖ്യമന്ത്രി പിണറായി വിജയൻ ജി. സുധാകരനു അയച്ചതെന്ന പേരിൽ ഒരു വ്യാജ കവിത സമൂഹ മാധ്യമങ്ങളിൽ പ്രചരിക്കുന്നതിനെതിരെ ജി സുധാകരൻ അമ്പലപ്പുഴ ഡിവൈഎസ്പിക്ക് പരാതി നൽകിയിരുന്നു. ഈ പരാതിയുടെ അടിസ്ഥാനത്തിലാണ് കേസ്. തന്റെ പേരിൽ വ്യാജ കവിത പ്രചരിപ്പിക്കുന്നവർക്കെതിരെ കർശന നടപടി വേണമെന്ന് ജി. സുധാകരൻ ആവശ്യപ്പെട്ടിരുന്നു. നിലവിൽ കേസിൽ ആരെയും പ്രതി ചേർത്തിട്ടില്ല. ജി. സുധാകരന് കവിത അയച്ചു നൽകിയ സുഹൃത്തിന്റെയും വാട്സ്ആപ്പ് ഗ്രൂപ്പുകളിൽ വ്യാജ കവിത പ്രചരിപ്പിച്ചവരുടെയും വിശദമായ മൊഴി എടുക്കും. കവിതയുടെ ഉറവിടം അന്വേഷിക്കുകയാണെന്ന് പൊലിസ് അറിയിച്ചു.
