പത്തനംതിട്ട – ശാസ്ത്ര സാങ്കേതിക വിദ്യയിലെ പുരോഗതിക്കൊപ്പം നമ്മുടെ കാഴ്ചപ്പാടും മാറണമെന്ന് ജില്ലാകളക്ടർ ഡോ.ദിവ്യ.എസ്.അയ്യർ പറഞ്ഞു. മുപ്പത്തിയാറാമത് ദേശീയ നേത്രദാന പക്ഷാചരണത്തിന്റെ സമാപനസമ്മേളനം വടശേരിക്കര ഗ്രാമപഞ്ചായത്ത് ഹാളിൽ ഉദ്ഘാടനം ചെയ്ത് സംസാരിക്കുകയായിരുന്നു ജില്ലാകളക്ടർ. നേത്രദാനം ചെയ്താൽ ഒരുവിധ വൈരൂപ്യവും ഉണ്ടാകുകയില്ലെന്ന വസ്തുതയും നേത്രദാനത്തിന്റെ ആവശ്യകതയും പൊതുജനങ്ങൾക്കിടയിൽ വ്യാപകമായി പ്രചരിപ്പിക്കണമെന്നും കളക്ടർപറഞ്ഞു. ചടങ്ങിൽ പഞ്ചായത്ത് പ്രസിഡന്റ് ലതാ മോഹൻ അധ്യക്ഷത വഹിച്ചു. നേത്രദാന സമ്മതപത്രം പഞ്ചായത്ത് പ്രസിഡന്റിൽ നിന്നും ഡെപ്യൂട്ടി ഡി.എം.ഒ ഡോ. ഐപ്പ് ജോസഫ് ഏറ്റുവാങ്ങി. പത്തനംതിട്ട ജനറൽ ആശുപത്രി നേത്രരോഗവിദഗ്ദ ഡോ. രേഖ നേത്രദാന ബോധവൽക്കരണ ക്ലാസ് നയിച്ചു. കാഴ്ചനേത്രദാന സേന ജനറൽ സെക്രട്ടറി അഡ്വ.റോഷൻ റോയിമാത്യു മുഖ്യാതിഥിയായി. ത്രിതല പഞ്ചായത്തംഗങ്ങൾ ചടങ്ങിൽ സംബന്ധിച്ചു. ജില്ലാ അന്ധതാ നിവാരണ സമിതി, കാഴ്ചനേത്രദാന സേന,വടശേരിക്കര ഗ്രാമപഞ്ചായത്ത്,കുടുംബാരോഗ്യ കേന്ദ്രം വടശേരിക്കര, ആരോഗ്യ കേരളം, ജില്ലാമെഡിക്കൽ ഓഫീസ് എന്നിവ സംയുക്തമായാണ് ചടങ്ങ് സംഘടിപ്പിച്ചത്.സമ്മേളനത്തിനു ശേഷം സൗജന്യനേത്ര പരിശോധനാ ക്യാമ്പ് നടത്തി.
