ആറന്മുള : കഴിഞ്ഞ ദിവസം വള്ളസദ്യയിൽ പങ്കെടുക്കാൻ ശശി തരൂർ എം.പി. ആറന്മുള പാർഥസാരഥി ക്ഷേത്രത്തിൽ എത്തി. വള്ളസദ്യ വഴിപാട് ബുക്കുചെയ്ത കലാമണ്ഡലം മുൻ വൈസ് ചാൻസലർ പി.എൻ. സുരേഷിൻറെ അതിഥിയായാണ് അദ്ദേഹം എത്തിയത്. തൈമറവുംകര പള്ളിയോടത്തിനായിരുന്നു വള്ളസദ്യ . പള്ളിയോടത്തിൽ കയറി കരക്കാർക്കൊപ്പമെത്തിയ ശശിതരൂർ ക്ഷേത്രക്കടവു മുതൽ കൊടിമരച്ചുവടുവരെ നടന്ന് വള്ളപ്പാട്ടും പാടി അവർക്കൊപ്പം കൂടി. ഊട്ടുപുരയിലെത്തി വള്ളസദ്യ വിഭവങ്ങൾ ആസ്വദിച്ച് കഴിച്ചു. എല്ലാവർക്കുമൊപ്പം ചിത്രങ്ങളെടുക്കാനും സഹകരിച്ച അദ്ദേഹം മൂന്നുമണിവരെ സത്രത്തിൽ വിശ്രമിച്ച ശേഷമാണ് ആറന്മുളയിൽ നിന്ന് യാത്രയായത്.
