തൃശൂർ – കൂലിപ്പണിക്ക് പോകാൻ അവധിക്കപേക്ഷ എന്ന വേറിട്ട പ്രതിഷേധവുമായി കെഎസ്ആര്ടിസി ഡ്രൈവര്. ജോലി ചെയ്തതിന്റെ വേതനം കൊട്ടാത്തതിനാൽ കൂലിപ്പണി എടുക്കാൻ അവധി ചോദിച്ചായിരുന്നു കെഎസ്ആര്ടിസി ഡ്രൈവര് അജുവിന്റെ അവധിക്കത്ത് പ്രതിഷേധം. ചാലക്കുടി ഡിപ്പോയിലെ ഡ്രൈവറായ അജു കൂലിപ്പണിക്ക് പോകാന് 3 ദിവസത്തെ അവധി ചോദിച്ചു കത്തു നൽകിയത് . ബൈക്കില് പെട്രോള് അടിക്കാൻ പോലും കാശില്ലെന്ന് അജു പറയുന്നു. ഗതികേട് കൊണ്ട് പ്രതിഷേധിച്ചതാണെന്നും അവധിക്കത്ത് തിരികെ വാങ്ങിയെന്നും അജു പറഞ്ഞു.
സര്ക്കാര് നല്കി വരുന്ന സഹായധനം കൊടുക്കാത്തത് കൊണ്ടാണ് കെഎസ്ആര്ടിസിയില് ശമ്പളവിതരണം നീളാന് കാരണം എന്നാണറിയുന്നത്. കടുത്ത സാമ്പത്തിക പ്രതിസന്ധിയില് ഓടുന്ന കെഎസ്ആര്ടിസി, സര്ക്കാര് നല്കിവരുന്ന സഹായം കൊണ്ടാണ് ശമ്പളം എങ്കിലും നല്കുന്നത്. എല്ലാമാസവും അഞ്ചാം തീയതിക്ക് മുമ്പായി ആദ്യഗഡു നല്കുമെന്നായിരുന്നു മുഖ്യമന്ത്രിയുടെ ഉറപ്പ്. എന്നിട്ടും പലകുറി ഇത് പാളി. മൂന്ന് മാസം മുമ്പ് വരെ 50 കോടി രൂപയാണ് സര്ക്കാര് സഹായമായി നല്കിയിരുന്നത്. സാമ്പത്തിക പ്രതിസന്ധിമൂലം അത് മുപ്പത് കോടിയായി ചുരുക്കി. ഈമാസം ഇതുവരെ ശമ്പളം നല്കിയിട്ടുമില്ല.
കഴിഞ്ഞ വര്ഷവും സമാനമായി ജൂലൈ, ഓഗസ്റ്റ് മാസങ്ങളിലെ ശമ്പളം വൈകിയിരുന്നു. ഓണത്തിനുള്ള ആനുകൂല്യങ്ങള് ഇല്ലാതാക്കാനാണ് മാനേജ്മെന്റ് പ്രതിസന്ധി സൃഷ്ടിക്കുന്നതെന്ന് തൊഴിലാളി യൂണിയനുകള് കുറ്റപ്പെടുത്തുന്നു. രണ്ട് മാസത്തെ പെന്ഷനും കൊടുത്ത് തീര്ക്കാനുണ്ട്.
